Job 38

UJehova Uyakhuluma

1 Kwathi uJehova wasemphendula uJobe ephakathi kwesiphepho. Wathi:

2 “Ngubani na lowo odunga ukwaluleka kwami ngamazwi okungazi?

3 Ziqinise njengendoda; ngizakubuza, lawe uzangiphendula.

4 “Wawungaphi lapho ngangibeka izisekelo zomhlaba na? Ngitshela uma uzwisisa.

5 Ngubani owamisa izilinganiso zawo na? Phela angithi uyazi! Ngubani owayidonsayo intambo yokulinganisa kuwo na?

6 Izinsika zawo zamiswa phezu kwani na, loba ngubani owamisa ilitshe lawo legumbi na –

7 lapho izinkanyezi zokusa zazihlabelela kanyekanye lezingilosi zonke zamemeza ngentokozo?

8 “Ngubani owavalela ulwandle ngemuva kwezivalo lapho lwaselufohla esiswini na,

9 lapho ngenza amayezi aba yisambatho salo na ngalugoqela ngomnyama omkhulu,

10 lapho ngalubekela imikhawulo ngamisa iminyango yalo lemigoqo endaweni yayo,

11 lapho engathi, ‘Ungeza uze ufike lapha kodwa ungedluli; kulapha amagagasi akho azigqajayo aphelela khona?’

12 “Sewake wabekela ikuseni umthetho na, loba watshengisa ukusa indawo yakho

13 ukuba kuphakamise umhlaba ngemiphetho kuthintithe ababi abakuwo?

14 Umhlaba ubumbeka isimo njengebumba ufakwe uphawu; imibala yawo ikhanye ithi bha njengelembu.

15 Ababi bayacitshelwa ukukhanya, lengalo yabo ephakanyisiweyo iyephulwa.

16 “Sewake wahamba emithonjeni yolwandle na loba wahamba ezingoxweni zenziki yalo na?

17 Amasango okufa aseke abonakaliswa kuwe na? Usuke wawabona amasango ethunzi lokufa na?

18 Ubuqedisisile na ubukhulu bobubanzi bomhlaba? Ngitshela nxa ukwazi konke lokhu.

19 “Yiyiphi indlela eya ekhaya elihlala ukukhanya na? Ubumnyama bona buhlala ngaphi?

20 Ungakusa ezindaweni zakho na? Uyazazi izindlela eziya emizini yazo na?

21 Ye uyakwazi, ngoba wawuvele usuzelwe! Usuphile iminyaka yonke le!

22 “Sewake wangena eziphaleni zongqoqwane loba wabona iziphala zesiqhotho na,

23 engizilindisele izikhathi zohlupho, izinsuku zempi lokuhlasela na?

24 Ingaphi indlela eya esigodlweni sokwaba umbane, loba indawo yokuhlakaza umoya wempumalanga phezu komhlaba na?

25 Ngubani ogubhe intshukuntshu yezihlambo zezulu, lendlela yomdumo wesiphepho;

26 ukuthelezela ilizwe elingahlali muntu, inkangala okungelamuntu kuyo,

27 ukusuthisa ilizwe elilugwadule kulenze lihlume utshani na?

28 Izulu elinayo liloyise na? Ngubani onguyise wamathonsi amazolo na?

29 Ngesikabani isisu esizala iliqhwa na? Ngubani ozala umtshazo ovela phezulu na

30 lapho amanzi aba lukhuni njengelitshe, lapho iphezulu yolwandle ijiyile?

31 Ungasibopha na isiLimela lesi esihle? Ungazithukulula yini izintambo zeziNja?

32 Ungawuletha na uMthala ngesikhathi sawo loba ukhuphe inkanyezi ethiwa yiNgulube lemidlwane yayo?

33 Uyayazi imithetho yasezulwini na? Ungawakha yini umbuso kaNkulunkulu emhlabeni?

34 “Ungawamemeza yini amayezi uthi akunethise ngesihlambo samanzi?

35 Uyakuthuma yini ukuphazima kombane? Uyabika kuwe yini uthi, ‘Ngilapha’?

36 Ngubani owapha inhliziyo ukuhlakanipha kumbe owapha ingqondo ukuzwisisa na?

37 Ngubani olobuhlakaniphi bokubala amayezi na? Ngubani ongagenqula amaqhaga asezulwini na

38 nxa uthuli seluqina lamagade omhlabathi esebumbene?

39 “Uyasizingelela na isilwanekazi ukudla kwaso, uyiqede indlala yezilwane

40 lapho zilele emiphandwini yazo kumbe zicwathile ezixukwini?

41 Ngubani opha iwabayi ukudla lapho amatshiyane alo ekhala kuNkulunkulu ezulazula entula ukudla na?